Zapatero entama esti martes el so discursu d'investidura

"El Congresu los Diputaos acueye esti martes la primer xornada del alderique d'investidura qu'entamará al mediudía col discursu del candidatu a la Presidencia del Gobiernu propuestu pol Rei, José Luis Rodríguez Zapatero, y que siguirá pela tarde colos alderiques ""cara a cara"" que compartirá colos llíderes del Partíu Popular y del restu de les formaciones parlamentaries.

La sesión entamará a les 12.00 hores, momentu nel qu'ún de los secretarios de la Mesa del Congresu dará llectura a la propuesta del Rei sobre'l titular de la candidatura a la Presidencia del Gobiernu dempués de los aconceyamientos que mantuvira a lo llargo la selmana coles diferentes fuerces con representación parlamentaria.

El Presidente del Congresu, José Bono, que s'estrena esti día na Cámara, dará la pallabra momentos dempués al candidatu socialista nomáu pa ocupar el sillón presidencial, José Luis Rodríguez Zapatero, que va esponer, ensin llímite de tiempu, el programa políticu del Gobiernu, solicitando la confianza de la Cámara, según queda conseñao nel Reglamentu del Congresu.

Nel casu de que Zapatero nun fuera quien a algamar la mayoría absoluta, lo que paez bastante posible faciendo casu de les consultes feches la selmana pasada pol mesmu PSOE ente les diferentes fuerces d'oposición, tendrá que celebrase una nueva votación 48 hores dempués, ye dicir, el vienres. Nesa segunda vuelta, val con que'l candidatu socialista llegue a la mayoría simple, o lo que ye lo mesmo, a tener más votos a favor qu'a la escontra."