Bloque por Asturies presenta les sos propuestes estatutaries

"Bloque por Asturies considera ""inasumible"" el mantenimientu de la que ye, dende'l so puntu de vista, una situación de permanente torga nel desarrollu de les instituciones polítiques d'autogobiernu, llimitación de competencies básiques del Gobiernu asturianu o negación de la identidá como pueblu, dientro de la que s'atoparía la situación que vive anguaño la llingua asturiana, pa la que proponen ""la oficialidá y normalización en toles estayes de la vida pública"".

Al traviés d'una nota prensa, la formación política manifestó'l so convencimientu de que l'autogobiernu d'Asturies ""ye una idea estratéxica pa toles fuerces polítiques d'Asturies"".

Fuerces que tendríen d'ellaborar un Estatutu ""que salga de la negociación y l'alderique abiertu y sinceru ente políticos, fuerces sociales ya instituciones asturianes, col envís de ser un Estatutu que naza del alcuerdu más ampliu y que nun dexe fuera a nenguna parte de la sociedá asturiana"".

Asina mesmo considera perimportante que'l testu estatutariu tea ellaboráu al rodiu de cuatro exes cimeros: la capacidá política plena d'Asturies, el reconocimientu de la identidá coleutiva y la oficialidá de la llingua asturiana, l'ampliación de les competencies esclusives y la fonda reforma del sistema de financiación, asina como l'aprobación d'una Carta de Drechos Sociales."