Día mundial del alzheimer

Güei celébrase'l día mundial del mal d'Alzheimer, un mal neurodexenerativu qu'afecta n'Asturies a ente 13.000 y 16.000 persones, más de les dos terceres partes d'elles muyeres y cerca d'un terciu d'homes.

Anque la edá media del enfermu d'Alzheimer ye de 76 años pa los homes o 79 pa les muyeres, danse casos escepcionales con enfermos de menos de 50 años. Xeográficamente, el mal céntrase más en Xixón y la Cuenca'l Caudal.

La Fundación Alzheimer Asturies y l'Asociación de Familiares, que güei celebren institucionalmente'l día en Ribeseya, llamen l'atención sobre l'importante coste de los tratamientos pal mal. Una víctima del alzheimer precisa d'ente 80 y 90 hores selmanales d'atención y el coste de los cuidaos llega a los 19.000 euros al añu por paciente, anque namás el 4% de los pacientes reciben un tratamientu afayadizu a les sos necesidaes, mientres que los más de los enfermos namás reciben tratamientu sintomáticu con medicación antisicótica.

La Fundación Alzheimer alvierte que'l mal ye una epidemia del sieglu XXI, esistiendo n'España ente 500.000 y 800.000 víctimes ente diagnosticaes y ensin diagnosticar. La ciencia sigue ensin munches rempuestes pa un mal tan esbariosu que munches vegaes nun pue diagnosticase hasta dempués de la muerte y pal que los investigadores ven l'únicu camín nel estudiu con célules madre