La Xunta Pola Defensa empondera'l xestu de Valledor pero critica que nun aprete pola oficialidá n'Asturies

Dempués de les declaraciones de la Conseyera de Cultura Ana Rosa Migoya y del Grupu Parlamentariu Socialista descalificando l'actuación del conseyeru d'Asuntos Esteriores Javier Valledor, quien unvió una carta al ministru d'esteriores pidiendo-y que reclamare reconocimientu oficial pal asturianu n'europa, siguen produciéndose declaraciones d'axentes sociales implicaos nel procesu de normalización llingüística. Por parte de la Xunta Pola Defensa de la Llingua Asturiana, Nacho González, esplicó a Asturies.com que pa la Xunta nun cabe dulda de que ye positivo que se pida'l reconocimeintu oficial del asturianu nel ambitu de UE, pero quier recordá-y al conseyeru que "nun s'entama la casa pel teyáu" y que ye n'Asturies onde hai que facer primero l'asturianu llingua oficial, y onde más responsabilidá tien el partíu del conseyeru onde forma parte del gobiernu.

Per otru llau la Xunta tien claro que les reacciones del PSOE énte la carta demuestren el nulu interés que tien esti partíu por facer avances reales na cuestión del asturianu. Nacho González tamién apuntó qu'esta actitú del PSOE nun casa cola del restu de la sociedá y nin cola de la so propia militancia, como espeya la encuesta sociollingüística del profesor Francisco Llera Ramo. P'acabar, l'asociación de revindicación llingüística otra vuelta ve claro que ye mentira esi argumentu de que pa facer normalización del idioma nun fai falta que l'asturianu seya llingua oficial, como demuestra esti casu nel que la falta de reconocimientu oficial vuelve a torgar el desarrollu del asturianu como llingua n'Aasturies y nel mundu