Valledor píde-y a Moratinos que la UE reconoza l'asturianu

El conseyeru de Xusticia, Seguridá Pública y Rellaciones Esteriores, Francisco Javier García Valledor, ta acabante d'unviar una carta al ministru d'Asuntos Esteriores y Cooperación, Miguel Angel Moratinos, pa solicitar que l'asturianu pueda tener el mesmu tratamientu nel ámbitu de la Unión Europea que'l restu de llingües del Estáu.

La petición vien darréu de la inciativa del estáu Español pa qu'Europa reconoza oficialmente les llingües que yá lo son en territoriu español

Pal conseyeru, l'ausencia del asturianu supón una importante ausencia de la identidá asturiana como riqueza de la cultura española y europea y entiende que, anque la llingua nun seya oficial, el compromisu de protección, promoción y difusión de la llingua asturiana recoyíu nel Estatutu d'Autonomía del Principáu compromete a les alministraciones na protección del idioma porque la carta estatutara ye "llei orgánica del estáu" . Xunta esto, Valledor defende que, en cuantes que que la UE define una política común pal reconocimientu de los derechos llingüísticos y del patrimoniu cultural al traviés de la Carta Europea de llingües minoritaries, l'asturianu tien de reconocese a nivel européu.

La solicitú formal del conseyeru nun ye'l primer posicionamientu n'Asturies sobre la cuestión. Ayeri mesmo, Izquierda Asturiana (IAS) asoleyaba un comunicáu de prensa en que demandaba un compromisu del gobiernu asturianu, y sobremanera d'IU, a la qu'acusaba de querer nadar y guardar la ropa na cuestión sobre les llingües oficiales de la UE.

D'otra manera, la solicitú del estáu español, que pide la reconocencia europea ta armando un espolín bien gordu porque presenta dixebraes como llingües distintes el catalán y valencianu, variedaes dialectales d'un mesmu tueru qu'igüen una propuesta cauatrillingüe elevada a la UE xunta euskera y gallegu. España trabaya agora con poner una denominación conxunta "Catalán-Valencianu" según informa'l portal catalán Vilaweb.