L'Academia y el Conceyu Xixón firmen un conveniu

Na mañana d'ayeri l'Academia de la Llingua Asturiana y el Conceyu de Xixón firmaron un conveniu de collaboración. La presidenta de l'academia Ana Cano tamién tuvo unes palabres crítiques pa cola situación llegal del asturianu.

Esti conveniu tien que sirvir pa esparder, promocionar l'usu del asturianu nel conceyu Xixonés. Tantu l'alcaldesa de Xixón Paz Fernández Felgueroso, la presidenta de l'Academia de la Llingua Ana Cano, como la conceyala d'educación de Xixón Carmen Rúa, amosaron la so satisfacción pola firma del conveniu. Pa l'alcaldesa de Xixón esti conveniu ye una pasu más pa cumplir el pactu de gobiernu ente PSOE y IX-BPA. Con esti alcuerdu l'Academia va asesorar al Conceyu en cuestiones como la retulación de les dependencies municipales, igua de la toponimia rural del conceyu y en toes aquelles nes que seya necesario. La conceyala d'educación tamién s'allegró pola firma, y agradeció especialmente'l trabayu que realizó la responsable de la Oficina de la Llingua de Xixón Maria Xosé Rodríguez pa llegar a esti puntu.

Pela so parte Ana Cano sorrayó la importancia d'esti alcuerdu polo emblemáticu del Conceyu de Xixón. Anque tamién quixo dexar bien claro que tol trabayu de normalización que se pueda facer con esti tipu d'alcuerdos nun val pa na ensin un marcu llegal afayadizu, que ye ensin dubia la oficialidá del asturianu. Pa la presidenta de la institución llingüística, lo contrario ye engañáse o querer engañar, con too y con ello, Ana Cano espera que na próxima reforma del estatutu d'Asturies s'incluya la oficialidá del asturianu.