Abiertu'l plazu pa presentar alegaciones a la central de ciclu combináu de Lada

" Les alegaciones a la instalación d'una central de ciclu combináu en Lada (Llangréu), a la que s'opón la Coordinadora Ecoloxista d'Asturies, puen realizase nel plazu d'un mes a partir de mañana, dempués de que'l Boletín Oficial Principáu d'Asturies (BOPA) publicara l'anunciu pol que se somete a información pública'l pidimientu d'autorización ambiental integrada, autorización alministrativa, reconocencia d'utilidá pública y l'estudiu d'impactu ambiental de la planta.

La mesma, pidida por Iberdrola Generación SAU, va ser un grupu de ciclu combináu de xeneración d'electricidá, con configuración 'monoexe' y con una potencia total aproximada de 1.100 megawatios. Va tar nos terrenos de l'actual central térmica de Lada y va tener un presupuestu de 460,52 millones d'euros. Les alegaciones puen presentase por triplicáu, en Delegación del Gobiernu.

OPOSICIÓN ECOLOXISTA

La Coordinadora Ecoloxista d'Asturies mostró esti mesmu llunes la so ""completa oposición"" al proyectu de la central de ciclu combináu. Al traviés d'una nota prensa recoyida por Europa Press, los ecoloxistes recordaron que la nueva instalación pretende realizar nel conceyu ""contamináu"" de Llangréu, que foi declaráu Zona d'Atmósfera Contaminada nel añu 1.984, catalogación que dio llugar a la ellaboración de los correspondientes Planes de Saniamientu Atmosféricu y a l'adopción de midíes ""en munchos casos escases"" pa rebaxar los niveles de contaminación atmosférica nel conceyu.
Al so xuiciu, la puesta en marcha d'un nuevu grupu termoeléctricu en Lada pue aumentar significativamente los niveles d'emisiones nel conceyu y los niveles de respiración de los principales contaminantes atmosféricos. Consideraron asina ""necesario"" realizar un estudiu de previsiones y valorar l'afección concreta que nel contestu atmosféricu llangreanu pue provocar la colocación d'un nuevu grupu de ciclu combináu.

Los responsables de la Coordinadora dixeron que l'argumentu utilizáu polos promotores de les centrales de ciclu combináu, de ser ""menos contaminantes"" que les de carbón, sólo s'entiende si vienen a sustituyir a éstes, ""lo que nun ye intención de la empresa promotora, colo que diben tar funcionando al mesmu tiempu los grupos térmicos de carbón esistentes, y los nuevos grupos de gas"".

Amás, apuntaron que la nueva central de ciclu combináu diba colocase casi nel centru xeográficu de Llangréu. Esto diba suponer que'l distritu de La Felguera (20.000 habitantes aproximadamente) y el distritu de Lada (4.000 habitantes) diben alcontrase nel entornu inmediatu de la nueva central, hasta'l puntu de que nun radiu de 100-200 metros diben llocalizase abondes viviendes y equipamientos, inda dos colexos, el colexu públicu Turiellos y el colexu de Les Dominiques."