Carlos Rubiera torna a los grandes del lied

El cantante asturianu Carlos Rubiera quier seguir pel camín qu'abriere l'añu pasáu con "Viaxe al Silenciu" y tien en preparación un interesante proyectu pa facer un discu con versiones n'asturianu de grandes lied del romanticismu européu.

Grandes compositores de la primer mitada del sieglu XIX como Schumann, Mendelssohn, Brahms o Gounod tan ente los nomes colos que'l barítonu asturianu trabaya na creación d'un nuevu discu que tien pendiente la eterna cuestión de la financiación pa poder convertise nuna realidá. Carlos Rubiera, qu'estrenare una nueva dómina na so carrera musical con "Viaxe al silenciu" discu nel que camudó'l tradicional rexistru de cantautor por una nueva carrera como barítonu, encargóse elli mesmu de facer la torna al asturianu d'estes canciones clásiques, que tan pendientes agora d'alcontrar financiación pal proyectu.