Nueche Celta del Conceyu d'Ayer

El Conceyu d'Ayer, en collaboración en collaboración
cola obra social de Caxastur, entama otra vuelta una nueche folk que llega a la
novena edición.



Sotu d'Ayer va acoyer esta nueche folk, qu'anque suene raro, nueche
entama de tarde, y ye que ta poniéndose de moda en munches d'estes
iniciatives entamar una riestra d'actividaes pela tarde, pa dir dando vida a lo
que tien que ser una nueche de folixa. Dende les 17:00 hores va haber un
"Mercáu Celta" colos habituales puestos d'artesanía y
productos asturianos, amás de dellos talleres p'amosar en vivu'l trabayu
de los artesanos. Amás dende les 17:30 hasta les 19:30 va haber
posibilidá de xugar a xuegos tradicionales, los bolos, la llave, los
zancos, la rana, tiru cuerda, tiru al palu, baltu, etc.



A eso de les siete y media l'asociación la Quintana de
Xixón va facer un conciertu didácticu, nél va facese un
recorríu musical y divulgativu pelos instrumentos tradicionales
asturianos. Tamién va tar instalada tola tarde una esposición
sobre folcloristes asturianos y instrumentos asturianos. A les 21:00, cuando
yá entama a atapecer, vamos poder echar unos bailles nun taller de
baille, d'eta manera podemos preparanos pa movese nel conciertu
qu'entamará darréu.



A les 22:00 la nueche yá pide qu'arranque la música, y
dende esa hora van entamar los grupos a subíse al escenariu. Los grupos
d'esti añu son los locales
"Tarañu",
acabantes de sacar discu que podéis sentir como'l discu de la selmana en
Asturies.com Radio,
los gallegos "Pepe
Vaamonde Grupo", proyectu del gaiteru Pepe Vaamonde qu'esperimenta
colos instrumentos tradicionales con composiciones del propiu gaiteru. Otru
grupu de fuera d'Asturies que va actuar nesta nueche folk son los
mítcos "Kornog", la banda
del bouzoukista Jamine McMenemy, el vigulineru Christian Lemaître, el
guitarrista Soïg Sébril y el flauteru Jean-Michel Veilon tuvieron
per Asturies nun va muncho tiempu, y repiten visita esta vegada nuna de les
nueches folk con más solera d'Asturies. El grupu que completa'l cartel
de la nueche ye "N'Arba" abondo conocíos polos aficionaos
asturianos, y que siguen trabayando pa sacar l'añu qu'entra un nuevu
discu a la cai. Amás a les doce la nueche va haber un espectáculu
musical y de malabaristes pa dar un toque más especial a esti prestosu
festival folk.