Música en solidaridá colos mineros

Esti sábadu ta organizáu un conciertu en Cangas pa sofitar la fuelga entamada polos mineros de Coto Minero del Narcea que yá dura cuatro meses.

Son 106 los mineros de la empresa Coto Minero del Narcea que tan en fuelga dende'l pasáu siete de mayu pol despidu de 12 compañeros, y p'algamar meyores na seguridá nes esplotaciones. Dempués de cuatro meses la situación económica de munches de les families ye complicada al nun tener sueldu a lo llargo de too esti tiempu. Poro, el comité d'empresa de Coto Minero del Narcea, xunta los sindicatos UXT y CC.OO, entamen un conciertu cuya recaudación da dir p'alliviar les dificultaes económiques de les families de los mineros en fuelga. Nél van tocar de forma desinteresada Rafa Lorenzo, cantautor tinetense y organizador, "Dixebra", "Cirigüeña", "Nuberu", la Bandina tradicional de Corvera, "Tomás y los demás", "Guxán de lluz", "El último tren", de Cangas, Pedro Pereira de Xedré, y el poeta xixonés José María Pelto. Los gastos del escenariu, equipu de música y lluz van correr por cuenta de los Conceyos de Cangas, Ibias, Degaña y Tinéu y la entrada va costar10 euros.

El conciertu va desenvolvése a partir de les 20:30 nel patiu de la "Escuela de la Vega" onde va haber una barra con bebida y comida, en resumen, una bona oportunidá pa sentir dellos estilos musicales con una causa común.