Tejedor, meyor cantar n'asturianu nos Premios de la Música

"Los premios de l'Academia de la Música reconocieron el llabor de los artistes asturianos. L'academia otorgó'l premiu al meyor cantar n'asturianu al grupu formáu polos hermanos Tejedor, que competía cola canción ""Seique non"". Esi cantar yá tuviera nomináu l'añu pasáu dientro de los premios al meyor cantar n'asturianu qu'entrega la Conseyería de Cultura, y qu'esi añu llevara Toli Morilla por ""Azul y gris"".

La importancia d'esti premiu ta venceyada a la trescendencia de que l'Academia de les Artes y les Ciencies de la Música dedique un premiu a un cantar en llingua asturiana, lo mesmo que fai con llingües con reconocencia oficial como'l catalán o'l gallegu.

Precisamente nesta llingua los galardonaos foron el grupu ""Luar na Lubre"" col cantar ""Canto de andar"". Esti mesmu grupu foi tamién galardonáu col premiu al meyor álbum de música tradicional por ""Camiños da fin da terra"".

No que cinca al restu de la gala, el cantante Miguel Bosé foi en ""vencedor"" de la entrega de premios, yá qu'algamó tres de los cinco premios a los que taba nomináu. L'autor de ""Papito"", qu'esti xueves cumplía 52 años, nun asistió a la fiesta, polo que nun pudo recoyer en persona los premios a meyor álbum, producción musical y téunicu de soníu."