El Principáu fai un apueste pola Oveya Xalda

La Conseyería de Mediu Rural y Pesca y l'Asociación de Criadores d'Oveya Xalda ACOXA firmaron güei un conveniu de collaboración que va poner, a lo llargo de los próximos trés años, 103.000 euros pa la conservación de la especie

La Conseyera de Mediu Rural Servanda García, el director de Mediu Rural Ibo Alvarez, y el presidente d'ACOXA, José Antonio Alvarez asistieron esta mañana a la fira del conveniu, que taba aprebáu pol Conseyu de Gobiernu d'Asturies

La preservación la raza al traviés de la meyora de los recursos xenéticos animales, la meyora de la pureza de la especie y el que la carne d'oveya xalda gane en reconocimientu social son parte de los oxetivos del conveniu acabante firmar, que tamién va acutar un separtáu pa estudiar el posible dañu de la Encefalopatía Esponxiforme a la especie

Pa la Conseyera de mediu Rural el conveniu supón una continuación de los que ya se firmaren colos criadores de l'Asturiana de los Valles o l'asturcón. ACOXA, que lleva funcionando dende 1994, ye la principal responsable de qu'anguaño pueda falase de recuperación de la especie, de la que ñacen al añu, por términu mediu, una cifra de 400 corderos.

Pa ser a meyorar esta producción, ACOXA márcase l'oxetivu de llegar a les 1.000 femes y dalgo más de 100 machos, que, con ser muncho, queda mui lloñe de les 600.000 femes qu'esistíen nel sieglu XVIII al dicir de José Antonio Alvarez. Tamién ye preciso meyorar la cifra de criadores dedicaos a la especie, qu'agora mesmo ye de 72. Pa xubir estes cifres, dende ACOXA afalen a comer carne d'Oveya Xalda, porque pa qu'haya más xente criando y más animales, ye preciso qu'esta carne seya de consumu, anque ello paeza paradóxico pol fechu de qu'esta especie tuviere nun tris de quedar desaniciada, cuando a mediaos del sieglu XX la oveya xalda quedó arrequexada pola entrada masiva d'otres variedaes capaces de producir más carne en menos tiempu.