El petroleu garra fuelgu

Dempués de los topes de les últimes selmanes el preciu del petroleu tuvo una selmana a la baxa gracies a les meyores previsiones productives y a les garantíes d'abastecimientu. Xunta esto les bones estadístiques macroecónomiques y la torna de los inversores a los parqués tiraron p'arriba per unos índices mui castigaos.

Los mercaos financieros tuvieron una bona selmana de xubes pol repunte técnicu y pol interés de los inversores en mercar acciones a precios mui baxos. La comunidá inversora ya ta poniendo'l güeyu na Convención Republicana en Nueva York d'esta selmana con vistes a les presidenciales de los Estaos Xuníos.

La estadística más señera de la selmana pasada foi'l datu del PIB del segundu trimestre nos Estaos Xuníos que medró un 2,8%, según les meyores previsiones. Esti datu tiró p'arriba peles bolses énte les esperances de que la primer economía del Mundiu garre fuercia pa recuperase y entamar un nuevu periodu de xorrecimientu económicu. Tamién nos Estaos Xuníos s'espublizaron les estadístiques del índiz de confianza de la Universidá de Michigan con un resultáu de 95,9 puntos, meyor de lo esperao. El consumu personal norteamericanu tamién medró un 1,6%, trés décimes penriba de les estimaes polos economistes. Tamién foi anuncia'l datu del PIB de Reinu Xuníu, qu'algamó una medra del 0,9%, dientro les previsiones.

Los inversores del otru llau del Atlánticu celebraron los prestosos datos macroeconómicos con una importante apueste pola renta variable. Asina Wall Street tuvo un pieslle en positivo con un índiz Dow Jones penriba los 10.000 puntos dempués de medrar un 0,21% hasta los 10.195,01 puntos mentanto que l'índiz Nasdaq algamó los 1.862,09 puntos con una xuba del 0,49%.

Nel Vieyu Continente les xubes tamién tiraron pelos índices p'arriba, sobremanera nos parqués de Llondres, París y Francfort con xubes del 0,50%. Esti llunes la Bolsa de Llondres pieslla por fiestes, lo qu'influirá nos mercaos europeos con una mayor tranquilidá.

Meyora importante de la Bolsa de Madrid col meyor pieslle del Ibex nes últimes cuatro selmanes. El selectivu Ibex-35 algamó los 7.882,30 con una xuba nel conxuntu de la selmana del 2,3% no que ya ye la recuperanza del camín de los 8.000 puntos. El volume de negociu foi más bien baxu, alrodiu los 1.294 millones d'euros. Ente les mayores xubes destaquen la d'Avanzit (7,5%), Repsol, Unión Fenosa, Arcelor. TPI del Grupu Telefónica foi'l valor cola cayida más señera.

Los especuladores tiraron p'abaxo pela cotización del oru prieto y el barril Brent aposentó nos 40,50 dólares. El casu ye que'l preciu del petroleu nun tenía una cayía tan abultada dende setiembre del añu pasáu, anque nada nun garantiza que nun vaya xubir otra vuelta. Otramiente, feble selmana pal metal amariello ante la salida d'inversores pola meyor confianza qu'ufierta la xuba del dólar. Asina l'oru cotiza nos 404,10 dólares la onza.

La divisa norteamericana ta recuperando l'espaciu perdíu a favor del euru. Asina l'euru cotiza nos 1,2017 dólares unidá. La meyora de los datos macroeconómicos d'Estaos Uníos tan dando-y fuercia a la divisa verde y recuperando la confianza nos inversores. El mercáu de renta fixo tuvo una selmana tranquila onde'l bonu de referencia, el bund alemán, caltuvo la so rentabilidá nel 4,06%.