El votu de calidá de l'alcaldesa d'Arrasate (ANV) torga l'aprobación de la moción de condena a ETA

"El votu de calidá de l'alcaldesa d'Arrasate, Inocencia Galparsoro (ANV), torgó ayeri l'aprobación d'una moción del PP que pidía la condena del últimu comunicáu d'ETA nel qu'amenazaba a los militantes del PSOE.
La moción tuvo que ser votada por dos veces al producise un empate con siete votos a favor de la moción del PNV, EA y EB, y otros siete a la escontra, toos ellos d'ANV, demientres que l'edil d'Aralar astúvose nes dos votaciones.
L'empate, que foi desfechu pol votu de calidá de la primer edil, foi consecuencia de l'ausencia de los cuatro ediles del PSE-EE, d'un edil del PNV y d'otru d'EB.
Ente'l públicu taben partidarios de la izquierda abertzale que, demientres la votación, entraron dando glayíos de 'ANV aurrera' (p'alantre), amás de 'PNV traidor' y 'PP fascista'.
Tres el refugu de la moción, nel turnu d'entrugues, la edil del PP, Iciar Lamarain, tomó la pallabra pa criticar ""la vergoñosa actitú del PNV que permitió que quien nun condena l'asesinatu siga dirixendo'l conceyu de Mondragón"". ""Sólo quieren el poder caiga quien caiga y pel camín perdieron la dignidá y los principios"", denunció, pa de siguío dirixise a l'alcaldesa, a quien entrugó si refuga ella y el so grupu l'últimu comunicáu d'ETA, y si muestra'l so refugu a los métodos qu'usa la banda terrorista"".
Énte esto, Galparsoro respondió que'l PP nun-y tien que dar lleiciones de democracia y añadió que ""n'Euskal Herria hai un conflictu políticu, y que pa da-y solución hai que reconocer qu'hai más d'una parte, y vosotros nun lo facéis"". Pela so parte la edil del PP retrucó-y qu'ANV ""siempre tien la pallabra conflictu na boca, pero'l primer y únicu conflictu que tenemos equí ye qu'ETA dexe de matar, que mos dexe alendar y vivir tranquilos a les xentes d'esti pueblu, y sabéislo vosotros meyor que naide""."