Les mines antipersona xeneren cada añu 15.000 víctimes

"Fairíen falta 1.100 años y 30.000 millones d'euros p'acabar colos 167 millones de mines antipersona qu'hai en 78 países del mundu, según denunciaron les ONG de la campaña ""Vides Minaes"" al rodiu de la conmemoración del Día Internacional d'Aición escontra esti tipu d'armamentu. Según ""Manos Unidas"", ""Intermón Oxfam"" y ""Médicos sin Fronteras"", les mines antipersona xeneren cada añu más de 15.000 nueves víctimes, y por embargu, once años dempués de la robla del Tratáu d'Ottawa onde se conseñaba la so illegalidá, ""cuarenta países"", ente ellos Rusia, Estaos Xuníos y China ""siguen refugándolu"".

""Les güelgues que dexen les mines son más fondes que los efeutos de cualesquier arma: amás de tarazar los miembros o les vides, tamién son una torga pa la llibre entrada de los aldeanos a les sos propies tierres, de les muyeres a los pozos d'agua o los neños y neñes al colexu"", denuncien les organizaciones.

Anque fabricar una mina cuesta namás 3 euros,el procesu de desmináu supón ""un pozu ensin fondu de gastos pa los países más afeutaos"" yá qu'allugar, desactivar y destruyir cada mina tien un costu de más de 750 euros, y dao que les más d'elles tán asitiaes en países con pocos recursos, ""miles de persones pasen a formar parte, añalmente, del impresionante exércitu de mutilaos del mundu""."