Google, una puntucom que cotiza alto

Los dos mozos fundadores d'esta puntu com, Sergy Brin y Larry Page, ya tan no cimero de la llista de trunfadores y millonarios de la rede con un patrimoniu particular caún penriba los 3.900 millones de dólares. Dempués de crear Google hai yá seyes años, la empresa tien más de 2.500 trabayadores y cuenta con una capitalización bursátil de 28.000 millones de dólares, mui penriba d'empreses de sectores mas tradicionales como General Motors o Ford anque perbaxo d'otres puntu com y tecnolóxiques como Yahoo o nun digamos Microsoft, que val 294.000 millones de dólares.

Y ello que la salida a bolsa del buscador nun foi fácil. Dempués d'una baxada na demanda d'acciones poles complicaciones de la OPV, Google dio un pasu atrás y baxó la ufierta d'aiciones asina como'l preciu d'entamu nel mercáu.

Al final, Google entamó a cotizar dende los 85 dólares poniendo nel mercáu 19,6 millones d'acciones. Baxo'l códigu de "GOOG" la compañía d'Internet asitióse'l primer día nos 100 dólares por acción siendo'l pieslle d'esti vienres nos 108 dólares-acción. Pero foron solo los inversores norteamericanos los que tuvieron la oportunidá d'acudir a esta OPV en cuantes que Google nun comercializó la so ufierta ne restu del mundu. Los analistes son mui prudentes y nun consideren qu'esto seya signu d'una recuperación del sector tecnolóxicu y tamién tienen duldes sobre'l futuru de la compañía. Los brokers desconfíen del destín que vayan da-yos Page y Brin a les perres recaudaes, más de 1.670 millones de dólares, xunta'l camín que puedan garrar les acciones dempués de que los trabayadores de la puntu com entamen a vender la parte que-yos correspuende d'equí a la vuelta de quince díes.

Pero pa llegar hasta equí Google tuvo que quitar les torgues qu'aprucieron nel camín de la so OPV. Por exemplu, l'idealismu de los dos mozos fundadores del buscador que taben a la gueta d'innovar con una ufierta d'aiciones diferente y única: queríen una subasta electrónica onde los particulares punxeren preciu al buscador. La realidá impúsose y foron los bancos d'inversión los que marcaron los precios.

Tamién, dende l'anuncia de la OPV de Google los principales rivales del buscador entamaron una carrera p'asitiase nun mercáu mui competitivu. Yahoo y Microsoft aceleraron la compra d'empreses d'Internet y de software y desarrollaron munchos productos pa quita-y clientes y usuarios a Google. Google intentó responder cola iniciativa del polémicu sirvidor de corréu Gmail, col desarrollu d'un serviciu de contactos Orkut dempués de fracasar nel intentu de mercar FriendSter.com, cola creación del buscador de productos Froogle.com y cola compra d'unes pequeñes empreses. La polémica pol repartu d'acciones illegales ente directivos foi una mala anuncia pal buscador xunta una entrevista a los fundadores na revista Playboy que tuvo nun tris d'allancar la salida a bolsa pola posibilidá de que la entrevista na revista de Larry Flint franciere un reglamentu de la SEC (la CNMV de los Estaos Uníos). El casu ye que Google ya cotiza nel Nasdaq y agora la comunidá inversora va ser la que xuegue col destín del buscador más popular del mundu.