Entamen les I Xornaes de Llingua y Educación

"Esti vienres, a les 16.15 hores, entamen les I Xornaes de Llingua y Educación que'l sindicatu d'enseñanza SUATEA organiza en collaboración col CPR de Xixón, la Conseyería de Cultura y Turismu del Principáu d'Asturies, la Oficina Municipal de la Llingua del Ayuntamientu de Xixón y el selmanariu Les Noticies.

La primer mesa redonda xirará al rodiu de los ""Derechos Llingüísticos nel marcu Européu y nel Estáu Español"" y la segunda afondará na importancia de ""Los axentes sociales y la defensa de los derechos llingüísticos"", participando na esposición representantes de coleutivos sociales y medios de comunicación.

Yá na xornada del sábadu, tendrá llugar la esposición de temes rellacionaos cola Política Llingüística y la Formación del Profesoráu, cuntando nesti casu cola participación de maestros, pedagogos y espertos en sociollingüística de dientro y fuera d'Asturies. Na tarde del sábadu, y poniendo con ello'l puntu a les xornaes, ta programada la esposición d'esperiencies educatives concretes, tanto nel ámbitu escolar como nel social.

Toles actividaes del programa van tener llugar nel Centru de Cultura Antiguu Institutu de Xixón."