Biedes ye un pueblu del conceyu Piloña que como munchos esti fin de selmana ta en fiestes, lo especial d'esti pueblu ye que xunten nuna nueche música d'orquesta de romería, y bon folk asturiano.
Les fiestes de Biedes entamen güei sábadu catorce y acaben al día siguiente domingu. El sábadu, enantes de la nueche de folixa, la organización ufiertanos la posibilidá d'averanos a la mitoloxía asturiana con una charra del etnógrafu Berto Peña nes escueles del pueblu a les 19:00 hores. Cuando caiga la nueche va entamar la música con una orquesta de romería que de xuru pasara per tolos grandes ésitos del branu d'esti y otros años. A les 00:00 llega la hora de la música asturiana cola actuación de "Ai Caminu" bandina tradicional compuesta por músicos de Parres y Cabrales, darréu d'ellos "Los Ciquitrinos" nel so estáu natural prau y fiesta, y p'acabar el postre colos xixoneses "Felpeyu". Dempués de la sesión de folk, va volver a tocar la orquesta pa que la nueche acabe bien tarde y lo más animao posible. Al día siguiente domingu hai'l programa habitual d'unes fiestes, dende pola mañana sesión vermouth, puya'l ramu, xuegos pa neños pela tarde y verbena pela nueche, too ello organizao pola asociación "Amigos de Biedes".