El xeitu de Tarañu

Eso ye lo que podemos descubrir si escuchamos el primer discu d'esti grupu, "Al xeitu de nenyuri" primer discu del grupu "Tarañu".

Un grupu de moces y mozos ayeranos son los responsables d'esti nuevu discu de folk asturiano. La banda, como suel ser norma nos conxuntos de la qu'entamen, yá llevaba tiempu pelos escenarios de les nueches folk, un pasu que marca'l que'l proyectu cuaye o non y qu'espeya'l sofitu del públicu a la so propuesta musical, un procesu que nel casu de Tarañu viose bien pronto qu'afalaba a metese a los estudios a grabar. Con too y con ello nun foi hasta esti branu cuando la banda decidiódar el pasu y grabar el so primer discu, cosa que ta acabante de facer cola casa "L'Aguañaz".

"Al xeitu de Nenyuri" son trece cantares de soníu acústicu y folk de la escuela de "Llan de Cubel" o "Xéliba" pero de la escuela los alumnos nun salieron igual que los sos "mayestros" y asina dan-y al discu un xeitu que tien que ser nel futuru la tarxeta de presentación del grupu. Primero de too, rescampla la calidá técnica de los músicos que dan nes más de les pieces un ritmu trepidante a tol discu. Como ye vezu nesti tipu de grupos, les cuerdes son nos más de los cantares la base melódica y rítmica del discu, nesti casu en manes Jose Luis Diaz col bouzouki y Dani Oubel cola guitarra acústica. A partir d'ehí van amestándose'l restu d'instrumentos, el bodrahn d'Elena Diaz, Gema Palacio col vigulín, Dani Álvarez nes xiblates y Xermán Álvarez cola gaita, bombarda y xiblates, instrumentación que llega de forma coherente con un estilu y interpretación de calidá. Na búsqueda del so xeitu ta claro de les fontes de les que bebieron los integrantes del grupu, el folk acústicu de la escuela que comentábamos enantes, anque como una de les sos característiques propies, déxennos munches vegaes un toque bretón, dende'l puntu de vista d'estilu, que reforzáse cola presencia en dellos cantares de la bombarda.

Otru puntu definitoriu del grupu son los temes cantaos cola voz bona voz de la vigulinera Gema Palacio. Son trés los cantares onde apaez esta voz suave con lletres y música de los miembros del grupu, qu'incorporen munches composiciones mecíes colos temes tradicionales a lo llargo de tol discu.

Nel capítulu de collaboraciones "Tarañu" supo rodiase de bonos amigos y músicos, Pablo Souto col contrabaxu, Manuel Cordero pa unes percusiones, Xuan Nel Exposito y el so curdión, Merce Santos cola zanfona y Alberto Ablanedo cola mandolina. Toos ello sumao acaba por danos un discu que de mano albidra un bon futuru pa esti grupu que toca "Al xeitu de nenyuri".