Pallabres n'asturianu nel Festival "Palabra y Música"

"Los escritores asturianos Pablo Texón y Sofía Castañón participarán esta nueche nel Festival ""Palabra y Música"", que va tener llugar durante esti fin de selmana nel Teatru de La Llaboral de Xixón, dientro de la programación de Llaboral Escena.
El Festival ""Pallabra & Música"" ta dedicáu al ""spoken word"" un xéneru desconocíu hasta hai poco nel nuestru país y que fai por xuntar testos recitaos - poesía, prosa o prosa poética - con música creada, esclusivamente, p'acompañar les pallabres. O a la escontra. Nesti casu los poetes asturianos van tar acompañaos polos holandeses Veenfabriek, mereciendo la pena sorrayar qu'ún d'ellos, Pablo Texón, recitará los sos poemes n'asturianu, llingua d'espresión de tola so obra lliteraria.

El programa d'esti vienres complétase cola participación del cantante de grupu de country alternativu Richmond Fontaine, Willie Vlautin. D'otru llau, y yá na xornada del sábadu, l'escenariu de La Llaboral recibirá ún de los platos fuertes del Festival, l'americanu Henry Rollins, ún de los cabezaleros del movimientu Hardcore y vocalista de grupos como Black Flag, que pue considerase'l pioneru absolutu del ""spoken word"".

Pa finar, na programación del domingu, el grupu Marlango actuará acompañáu pola prosa poética del italianu Alessandro Baricco, autor ente otros de llibros como ""Seda"", ""Océano Mar"" o ""Novecento""."