El BNG prestará los sos diputaos pal grupu parlamentariu d'IU, ICV y ERC

"El voceru del Bloque Nacionalista Gallegu (BNG) nel Congresu, Francisco Jorquera, confirmó esti xueves el fechu de que dos de los sos diputaos van sumase a Esquerra Republicana (ERC), Izquierda Unida (IU) ya Iniciativa per Catalunya (ICV) pa qu'estes formaciones puedan crear grupu parlamentariu propiu nel Congresu, dividiéndose'l grupu mestu que resultó de les elecciones del 9 de marzu.

Con too, Jorquera quixo dexar claro qu'esi préstamu de diputaos nun tien ""voluntá de ser definitivu"", sinón que van volver al Grupu Mestu xunta con Coalición Canaria, Nafarroa Bai y Unión, Progreso y Democracia (UPyD). De fechu, les lletres del BNG nun van apaecer na denomación del grupu parlamentariu resultante, que va tar rexistráu como ERC-IU-ICV.
Esta decisión pon-y el puntu a cuasi tres selmanes de negociaciones ente los partíos minoritarios col envís de dividir l'heteroxeneu Grupu Mestu resultante de les elecciones xenerales, que nun primer momentu diba tener once diputaos. El BNG tentara formar grupu parlamentariu con Coalición Canaria y los diputaos prestaos de CiU y PNV, pero tuvo de refugar esta opción ""por nun esistir voluntá política per parte de les fuerces mayoritaries de la Cámara, PSOE y PP."