Manuel Fernández de la Cera, nuevu presidente del Conseyu de Comunidaes Asturianes

De La Cera releva nel cargu a Antonio Trevín, quien tenía previsto dexar la responsabilidá al frente del organismu d'ayuda a la emigración desque se punxo al cargu de la Delegación de Gobiernu n'Asturies.

L'ascensu del númberu dos de Trevín nel CCA a la presidencia nun garró a nadie de sorpresa, y yera daqué colo que yá se contaba prácticamente dende'l mes de mayu.

Manuel Fernández de la Cera, hasta agora vicepresidente del CCA, salió escoyíu presidente de la entidá na xunta estraordinaria que se celebró esta mañana con motivu de la clausura del tercer cursu de la primer promoción de la Escuela d'Asturianía.

Manuel Fernández de la Cera (1940) foi conseyeru de Cultura nes primeres llexislatures del actual sistema democráticu, cuando Pedro de Silva ocupaba la presidencia d'Asturies, y foi tamién diputáu na Xunta Xeneral del Principáu pol PSOE. Siendo Conseyeru de Cultura foi ún de los miembros de la comisión encargada de desarrollar l'artículu 4 del estatutu d'autonomía de la que salió'l borrador de Decretu Llei pa la incorporación del asturianu a la enseñanza
.