"Énte'l cambiu climáticu, menos CO2"

"Delles organizaciones ecoloxistes, partíos y asociaciones de vecinos asturianes van participar el domingu 20 d'abril nuna manifestación escontra les emisiones de CO2, coincidiendo cola celebración del ""Día de la Tierra"" y coles movilizaciones que cuenten facese en tol mundu pa criticar les consecuencies del cambiu climáticu baxo'l llema: ""Énte'l cambiu climáticu, menos CO2"".

Nel casu asturianu la convocatoria va centrase na denuncia del proyeutu de Regasificadora pal puertu d'El Musel, confirmándose'l percorríu de la Playa Pando a la Playa l'Arbeyal en Xixón.

Dende'l puntu de vista de los ecoloxistes, n'Asturies el Gobiernu ta ""mirando pa otru llau"" no que cinca al problema del cambiu climáticu, ""condergando"" a los asturianos a tener los mayores niveles de contaminación del aire de toa España, asina como les mayores tases d'emisión de CO2 a l'atmósfera por habitante d'España, ""col impactu pa la salú qu'esto supón"".
Asina les organizaciones sorrayaron que, pese a conocese estos datos, el Gobiernu asturianu y les empreses eléctriques siguen preparando bayura de proyeutos, como los de la regasificadora, delles térmiques de gas, una térmica de carbón y tres llinies d'alta tensión nueves, asina como quince subestaciones eléctriques.

Ente toos ellos rescamplaría el ""impactu"" que tendría la regasificadora prevista n'El Musel, pol ""riesgu"" que supón al ""condergar"" a Asturies a siguir produciendo enerxía pa otres rexones alloñaes y quedar col ""riesgu ya l'impactu d'estes actividaes puerques, contaminantes y poco xeneradores de riqueces""."