Un pasu más haza la unificación de Chipre

"Un grupu de ciudadanos griegos y turcos de Chipre esbarrumbó les barricaes que separtaben dende hai mediu sieglu la cai Ledra, nel centru de Nicosia, poniendo-y asina'l puntu al símbolu de la división d'un país dixebráu pola guerra.

Nuna ceremonia a la qu'asistieron unviaos de la ONU y collaboradores de los dirixentes grecochipriotes y turcuchipriotes, asina como responsables locales, el tramu de 80 metros de carretera quedó abiertu a los peatones a les 9.27 hores, dempués de tar mediu sieglu peslláu. ""Toos sabemos qu'abrir la cai Ledra nun significa que'l problema de Chipre tea resueltu. Hai trabayu a esgaya por facer"", declaró la xefa de la misión d e Naciones Xuníes en Chipre, Elizabeth Spehar. ""Por embargu, l'apertura ye un niciu pa la esperanza"".

L'apertura de la cai ye un xestu simbólicu que se produz enantes de les negociaciones sobre'l conflictu na islla, conflictu que supón una torga pa les esperances de Turquía d'entrar na Unión Europea. Les dos comunidaes de Chipre tán dividíes dende 1974, momentu nel que Turquía invadió la islla en rempuesta al golpe d'Estáu inspiráu por Grecia, golpe qu'ensin embargu nun tuvo ésitu.

La división de la cai Ledra entamara hai unos 15 años, dempués de que los turcos llantaren les barricaes en 1958. El bloquéu de les carreteres quedó afitáu dempués de los enfrentamientos de 1963."