Más solombres sobre'l campu de golf de Cuideiru

Landmark National, una multinacional inmobiliaria y d'infraestructures deportives con sé en Maryland (EE.UU.) ye la promotora d'un proyectu pa facer en Cabu Vidíu un gran campu de golf de 18 furacos xunta un gran resorte inmobiliariu y turísticu. La so filial, Landmark Spain, con sé en Sevilla, anuncia na sos web la intención que tien d'espardese pela Península Ibérica, considerándola como "el meyor mercáu de desarrollu d'Europa". Michael Long, ún de los directivos de la compañía, declara na web que "el valor de la compañía ye la preservación del mediu ambiente".

La Coordinadora Ecoloxista diz qu'ello nun ye asina, y trés d'analizar les actividaes de Landmark n'otros llugares, llega a la conclusión de qu'esta empresa tien en contra d'ella vecinos y entidaes sociales ensin dir más lloñe que Madrid, onde'l proyectu de golf "Sierra Norte" propón una actuación asemeyada a la del Cabu Vidíu nun llugar protexíu de la sierra madrileña y clave pal abastecimientu d'agua de la capital española.

Según los ecoloxistes, otru tanto pasó cola mesma empresa n'Irlanda, onde landmark fizo nel 2001 el campu de Doonbeg, na costa oeste de la islla. Ellí, según denuncien los ecoloxistes, neto que pal proyectu del Cabu Vidíu, punxéronse los edificios del parque na mesma llinia de costa, ocupando pa ello parte del sistema de dunes local, que nunca nun se tocare nelli.

La controversia llegó hasta la Unión Europea, al traviés de la parlamentaria Patricia McKenna, del Green Party. N'avientu del 1999 esta diputada entrugó a la Comisión Europea sobre l'actuación, que diba facese nun llugar de gran valor ambiental col preste de les autoridaes irlandeses que recalificaron el llugar, hasta esi intre zona protexida.

Con llevar razón la diputada verde, como diz na rempuesta de la Presidenta de la Comisión Europea de Mediu Ambiente, Margot Wallström, el parque acabó por facese.

La Coordinadora llamenta que l'actitú Alcalde de Cuideiru y el Conseyeru de Mediu Ambiente qu'afalen de mano'l proyectu, pue dar llugar a un atropellu semeyante n'Asturies, onde según el grupu conservacionista ta "en xuegu" caltener un litoral con importantes valores ambientales y que nun se llegue a una situación asemeyada a la del mediterráneu, estráu de proyectos d'esta triba.