El PSOE asturianu entama un congresu ensin la tensión del anterior

El secretariu xeneral del PSOE, José Blanco, inaugura esta tarde'l XXIX Congresu de la Federación Socialista Asturiana (FSA) nel que, sacantes sorpresa, el partíu gobernante n'Asturies va escoyer a Javier Fernández pa un segundu mandatu na Federación Socialista Asturiana.

La situación del socialismu asturianu ye bien distinta a la de va trés años, cuando Luis Martínez Noval se despidió del cargu con un partíu dixebráu ente los guerristes del líder del SOMA José Ángel Fernández Villa, y el sector oficialista que lideraba Vicente Álvarez Areces, daquella acabante d'escoyer presidente del Principáu por mayoría absoluta

Javier Fernández, que se presentó daquella como candidatu del sector villista, ganó por bien poco al candidatu arecista Álvaro Álvarez. Trés años depués, Javier Fernández quier axuntar toles voluntaes en partíu y ganar por una mayoría lo más grande posible. Al tenor de la situación, na FSA nadie nun cuenta con qu'heba sorpreses y asina Fernández va ser candidatu únicu. Amás de los cargos internos de la executiva, los socialistes asturianos van decidir el nome de 7 representantes en comité federal.

Al congresu asisten más de 400 delegaos de tolos conceyos, y el trabayu de conteníu políticu va centrase en cuatro comisiones, la primera pa falar sobre'l centenariu de la FSA, la segunda será sobre'l entramáu institucional nel ámbitu rexonal y local, una comisión esta que va tocar los temes más rellacionaos cola futura reforma estatutaria., mientres que'l tema européu va tratase na tercer Comisión, la socieconómica, na que va debatise sobre la futura "eurorrexón del noroeste" na que los socialistes asturianos van defender la presencia d'Euskadi, Cantabria y la Rioja, contra'l paecer de Castiella y Llión, que quier enxertar a Extremadura. La cuarta comisión va ser la de participación política, organizativa y de comunicación social del partíu.