Alcuerdu ente la SGAE y Esbardu pa sacar alantre l’Intercélticu d’Avilés

Nun fizo falta llegar al xuiciu que taba puestu pa esta mañana. Un alcuerdu amistosu ente ente la Sociedá Xeneral d'Autores (SGAE) y l'Asociación Cultural "Esbardu" peslló la polémica sobre la posible cancelación de los conciertos más importantes del Festival Intercélticu d'Avilés, que va entamar mañana ensin problema dengún.

Responsables del Festival Intercélticu adelantaron esta mañana a Asturies.com los términos del alcuerdu al que dambes partes llegaron esta mañana pa salvar la edición d'anguaño del Intercélticu.

La demanda de la SGAE pasaba pela suspensión cautelar d'estos recitales y tamién por una fuerte demanda económica qu'andaba alredor del 10% del presupuestu total del Intercélticu, que ye de 150.000 euros, en conceptu de derechos d'autor dempués de siete años nos que'l Festival nun cotizó a la SGAE los cánones que demandaba. Contra la postura de la SGAE, los responsables del festival declaraben que lo que s'interpreta nos conciertos del Intercélticu ye, en más del 80% música tradicional que nun tien de pagar canon nengún a autores.

Con estes tenía de llegase güei a una vista en xulgáu d'Avilés, pero dambes partes consiguieron llegar a un alcuerdu amistosu na mesma sala d'espera del xulgáu que va salvar la VIII edición del Intercélticu avilesín. L'alcuerdu diz que los técnicos de la SGAE van facer un seguimientu pormenorizáu de los conciertos del festival pa llevantar auditoríes fiables que van ser poles que se mande l'ente de defensa de los derechos d'autor pa dempués pidir el canon que-y correspuenda a la organización. Nestes auditoríes namás van apaecer les pieces y cantares non tradicionales que correspuenden al repertoriu SGAE.

Juan Casas, director d'Esbardu, declaró a Asturies.com qu'esti yera l'alcuerdu al qu'ellos queríen llegar y la postura cola que taben d'alcuerdu yá de mano. En cuantes a la demanda sobre les tases SGAE de les siete ediciones anteriores del festival, Casas dixo que s'apautó dexar el tema pa una reunión que va facese en pasando'l Festival.

Gracies a esti alcuerdu, les actuaciones más importantes del Festival, casu de la de Tejedor prevista pal día 17, Llan de Cubel (día 23) o Lúnasa (día 24) van facese ensin nengún problema. Asturies.com va tar ellí y va ufiertar a tolos sos llectores un seguimientu especial de tolo que dea esti VIII Festival Intercélticu d'Avilés.