La coalición ente'l PAS y la URAS, a Conceyu Abiertu

El Partíu Asturianista y la Unión Renovadora asturiana tienen abiertu un procesu de diálogu con vistes a una posible xuntura de dambos partíos col horizonte a mediu plazu de les autonómiques del 2.007. Por de pronto, dambos partíos tan llevando una unidá d'acción en dellos temes clave, casu de la reforma del estatutu, pero tanto dende la URAS como dende'l PAS son mui prudentes a la hora de poner oxetivos y cuiden mui muncho d'adelantar quien podría ser l'hipotéticu cabeza de llista, anque per otra parte dellos militantes de dambes organizaciones son partidarios d'estender el procesu a más partíos, en referencia a Andecha Astur y Izquierda Asturiana.

Fontes del PAS y de la URAS consultaes por Asturies.com falaron de que'l procesu de diálogu va garrar un poco de fuelgu a lo llargo del veranu, pero dambes organizaciones tan considerando la posibilidá de facer un 8 de setiembre conxuntu como primer pasu d'un nuevu cursu políticu. Énte esti procesu, qu'involucra a dos fuerces que representaron, nes últimes autonómiques, más de 25.000 votos, consultamos a los llectores d'Asturies.com sobre l'enfotu -seya munchu o pocu- que tienen nuna posible xuntura ente PAS y URAS