Alonso respuende a les declaraciones del PNV

"El voceru del Grupu Socialista nel Congresu, José Antonio Alonso, aseguró esta mañana que yera ""llamentable"" l'actitú del PNV al refugar la moción de censura plantegada escontra de l'alcaldesa d'ANV en Mondragón, Inocencia Galparsoro.
En declaraciones a Telecinco, Alonso reconoció que la postura del PNV ""pon les coses difíciles"" no que cinca al entendimientu con PSOE. Ye más, aseguró que'l so partíu tien de ""camentar bien posao"" la so posición dempués del refugue del PNV a la moción de censura, que tuvo llugar demientres que los socialistes-yos confirmaben la cesión d'un puestu na Mesa de la Cámara. ""Esto pon les coses mui difíciles"", aseguró'l responsable socialista.

De cara a les negociaciones col PNV pa la investidura del presidente del Gobiernu, José Luis Rodríguez Zapatero, Alonso nun quixo ""adelantar acontecimientos"", anque sí volvió a dexar claro que la postura del PNV énte ANV ye, dende'l so puntu de vista, ""fondamente llamentable"", porque nun hai dulda de que'l partíu abertzale ""tien que tar fuera del Gobiernu municipal de Mondragón y de cualesquier otru sitiu que se puea"".

Na so opinión, la moción de censura presentada pol PSE nel Ayuntamientu de Mondragón yera ""una rempuesta política"" al asesinatu del ex conceyal socialista d'esa localidá, Isaías Carrasco, y poro un actu de ""plenu significáu""."