Pexes con marca

"Pexes del Cantábricu" ye la nueva marca con que van vendese dellos productos pesqueros orixinaos n'Asturies amás de n'Euskadi y Cantabria.

Galicia tovía nun entró a formar parte d'esti proyectu anque ye probable que s'amieste pal añu qu'entra a la iniciativa, que pretende promocionar los productos del Mar Cantábricu garantizando una calidá, garantía d'orixe y una correcta manipulación.

Asina estos van ser productos de calidá y tamién más caros anque dende les conseyeríes de pesca de les comunidaes promotores consideren que'l consumidor va ver el valor añadíu de la marca y les ventes van xubir.

Ente los pexes que va tener esta marca van tar el bocarte, les sardines, el bonitu del norte, atún roxo, xarda y el chicharru. D'entamu la llista de productos con la marca "Pexes del Cantábricu" van ser seyes pexes mentanto que nun se descarta ampliala pa incluyir la merluza o'l pulpu y mariscos como'l centollu o la perceba.

Ente los requisitos que tienen que cumplir los productos destaquen les artes de pesca emplegaes, el tamañu de les pieces, el llugar de desembarco y les zones de captures. A lo llargu de los próximos seyes meses les conseyeríes promotores van desendolcar un reglamentu que tien previstu entamar a furrular nel 2005.