L'asturianu na campaña universitaria

"El tema de la llingua asturiana y el so tratamientu nel ámbitu asturianu, siguió tando vivu na presentación de candidatures que tuvo llugar a lo llargo'l día d'ayeri. Vicente Gotor, que recibía a la prensa nel Edificiu Históricu de la Universidá, afitó'l compromisu que roblara hai cuatro años cola Xunta pola Defensa de la Llingua Asturiana, demientres que Paz d'Andrés, que presentó candidatura na Facultá de Drechu, sorrayó la so intención de poner en marcha ""un plan de normalización de la llingua asturiana na institución, fomentando l'usu de la mesma, ensin discriminación na vida académica diaria, y fomentando los estudios de llingua asturiana proyeutaos en comuña cola Academia de la Llingua"".

D'Andrés, única de los candidatos qu'ufierta na so páxina personal el programa completu de candidatura en llingua asturiana, afita nos puntos del mesmu una serie d'oxetivos concretos ente los que s'alcontraría: los estudios de llingua asturiana empobinaos al docente de la Educación Primaria ""n'igualdá de condiciones que'l restu de menciones que se contemplen"". Asina mesmo describe la formación del profesoráu d'asturianu de la Educación Secundaria, dientro de la estructura de títulu de Grau de la Facultá de Filoloxía ""de mou paralelu a les posibilidaes contemplaes pa otres llingües y filoloxíes de la tradición universitaria"".

D'otru llau, y no que cinca al usu normalizáu del asturianu nel ámbitu universitariu, la candidatura de Paz d'Andrés defende la ""la tramitación oral y escrita n'asturianu d'asuntos que cinquen al ámbitu universitariu; promoviendo, si fuere necesario, la formación en llingua asturiana d'aquellos emplegaos que, ocupando puestos claves, acueyan llibremente tal posibilidá"", midida pa la que promovería una serie d'alcuerdos de collaboración cola propia Academia de la Llingua.

La campaña eleutoral a rector de la Universidá d'Uviéu durará hasta'l sábadu 12 d'abril y el procesu de votación tendrá llugar el 15 d'abril nes propies instalaciones de la institución académica."