Músicos Asturianos collaboren con grupos gallegos

Xosé Ambás de "N'Arba" y Elias García de "Llan de Cubel" tan acabantes de participar na grabación de dos discos con bandes de folk gallegues.

Los músicos folk asturianos cada vez van garrando más nome nel panorama del folk estatal y internacional. Un exemplu d'ello ye que dalgunos de los nuesos músicos son demandaos por bandes de fuera pa participar nos sos discos, esti ye'l casu de Xosé Ambás y d'Elias García. El primeru grabó col grupu "Quempallou" que saca a la cai'l so segundu trabayu discográficu"Estremonías". Ambás pon voz al cantar númberu 8 del discu, "L.lume", "Dedicáu a L.lume ya a tola xente que fai daqué por al.lumar el mundu". "Quempallou" son una banda moza que lleva una carrera bien rápida, preba d'ello ye qu'esti añu van tocar nel Festival d'Ortigueira compartiendo escenariu colos míticos "Chieftains". Nel Festival tamién van tar los asturianos "Gatos del Fornu" y la banda de gaites "Fonte Fuecara".

Per otra parte Elias García collaboró nel discu "Hai un paraiso" del grupu de folk gallego con más proyección internacional, "Luar na Lubre". Esta nun ye la primer vegada que'l bouzouki d'Elias suena nun discu de la banda gallega, yá nel anterior discu del grupu, "Espiral", tamién collaboró nuna pieza del discu, y daquella tamién participó nel discu l'asturianu Javier Tejedor cola caxa escocesa.