L'Academia de la llingua felicita la iniciativa del Conceyu Abiertu Pola Oficialidá

El Conceyu Abiertu Pola Oficialidá entrevistóse ayeri cola Academia de la llingua Asturiana. Al conceyu asistió la presidenta de l'Alla Ana Cano, y el secretariu d'esta institución, Xosé Antón González Riaño, mientres que per parte del Conceyu Abiertu participaron Xulio Casado y Pilar Fernández. Dambes entidaes dieron una rueda de prensa coincidiendo cola reunión na que la presidenta de l'Academia dexó bien claro que l'Alla nun va participar nel Conceyu Abiertu pero que celebra y saluda la iniciativa d'esta plataforma, que ve necesaria nesti momentu. L'Alla ruempe asina cola llinia d'actuación que tuvo n'anterior reforma estatutaria, cuando foi una de les entidaes que-y dieron más pesu al "Pautu pol autogobiernu y la oficialidá".

Pela so parte, los responsables del Conceyu Abiertu Pola Oficialidá, que celebró asina'l so primer actu públicu dende que se presentare oficialmente'l día 22, sorrayaron que la plataforma sigue abriendo pontes con tol espectru políticu asturianu, teniendo acutaes entrevistes con PP y PSOE dientro de la so campaña centrada n'esparder los valores positivos de la oficialidá del asturianu. Los representantes del Conceyu Abiertu recordaron la celebración, esti vienres, d'una espicha en Llagar Quelo de Siero na que van participar representantes de les más d'ochenta organizaciones que soscriben el manifiestu del Conceyu Abiertu y que tamién ta abierta a les persones particulares que quieran dir.