Avilés dexa bañase en playes contaminaes

El Colectivu Ecoloxista d'Avilés ta cabante de pedí-y al Conceyu que señalice y avierta pelos medios afayadizos del peligru que cuerren los que van a bañase a les playes de San Balandrán, Zeluán y L'Arañón, les trés na Ría d'Avilés y afectaes por graves problemes de contaminación.

Los ecoloxistes avilesinos denuncien que yá lleven tiempu avisando a les autoridaes y qu'estes anden pasándose la responsabilidá ente elles ensin que nadie nun tome'l determín de señalizar estes playes, que tienen una presencia importante de metales pesaos y sobre les que nun hai plan de meyora dengún previstu hasta que la ría dexe de recibir los aportes contaminantes de les fábriques de la redolada. Laperegrinación de los grupos ambientalistes de la villa llevólos pelos despachos de Sanidá Ambiental y Consumu del Principáu d'Asturies, l'Autoridá Portuaria d'Avilés, la Dirección de Mediu Natural del Principáu, Demarcación de Costes, Dirección Xeneral de Calidá Ambiental y Obres Hidráuliques y al mesmu Ayuntamientu d'Avilés.

El grupu avilesín diz que los veceros d'estes playes cuerren un riesgu grand, reconocíu por análisis oficiales fechos pol Principáu, de contaminación por metales pesaos como'l cadmiu que puen caltriar por contactu dermatolóxicu col sable contaminao y tamién peles víes respiratories, un peligru al que s'esponen más los rapacinos. Énte esta situación, los ecoloxistes creen que l'Ayuntamientu pue tar incurriendo nuna neglixencia en cuantes que sabe del peligru esistente pero nun quier tomar una decisión impopular como sedría la de trancar les playes al bañu.