Entama la campaña de tráficu de veranu

La Dirección Xeneral de Tráficu ta pa echar a andar dende pasao mañana la campaña especial de veranu, cola que se pretende baxar l'indiz de siniestralidá nes carreteres nel tiempu en que más tráficu y más accidentes se rexistren. La DXT dio anuncia de qu'esti añu la campaña va estremase en dos partes, la primera a desarrollar nel mes de xunetu, va centrase nel consumu d'alcohol, poniendo más controles d'alcoholemia en toles carreteres y en más horarios.

La segunda parte va facese nel mes d'agostu y va trabayar el tema del escesu de velocidá. Esti añu los infractores van recibir en munchos casos la multa per corréu díes dempués de rexistrada la infracción ensin falta de que tenga que da-yos parte de la mesma un axente nel intre de cometela.

Como avisu pa navegantes, l'Asociación Europea d'Automovilistes tien na rede un llistáu colos puntos kilométricos onde más avecen les autoridaes a poner radares de control de velocidá. El llistáu de la AEA nun ye oficial y faise asitiando en mapa un muestréu de más de 5.000 denuncies tramitaes nesti semestre. El noyu de Serín de la "Y Griega" y el el desvíu de la mesma pa garrar la ronda d'Avilés son dos llugares clásicos que repiten na llista, na qu'entra como novedá la llegada a Xixón de l'Autovía Minera.