El represor arxentinu Cavallo niégase a declarar

"El represor arxentinu Ricardo Miguel Cavallo, estraditáu esti llunes dende España, negóse a declarar énte'l xuez federal Sergio Torres polos delitos que los que lu acusen, cometíos na Escuela de Mecánica de l'Armada durante la dictadura militar (1976-1983).

L'ex marín, acompañáu pol so abogáu defensor Alfredo Solari, sintió como-y nomaben los delitos que-y imputen por violaciones a los Drechos Humanos, y dempués, refugó facer nenguna declaración en rempuesta a les entrugues que teníen preparaes el xuez Torres y el fiscal Eduardo Taiano. Darréu d'ello, Cavallo foi treslladáu a la cárcel federal de Marcos Paz, onde hai un pabellón qu'agospia a otres persones acusaes de violar los Drechos Humanos, como'l sacerdote Christian Von Wernich.

Cavallo, qu'usaba'l nomatu de ""Sérpico"", ta acusáu de participar nel secuestru y desapaición de les monxes franceses Alice Domon y Leonie Duquet, asina como del escritor y periodista Rodolfo Walsh, desapaecíu nel primer aniversariu de la dictadura en 1977.

Cavallo formaba parte del ""Grupo de Tareas 3.3.2."" de la ESMA, que llegó a ser la mayor cárcel clandestina de la dictadura, edificiu nel que foron deteníes y torturaes unes 5.000 persones."