Los sindicatos de Xusticia dicen que la propuesta del Ministeriu ye "probe"

"Los sindicatos de Xusticia negaron esti martes la llegada definitiva del principiu d'alcuerdu qu'anunciaren dellos medios de comunicación. Alcuerdu que-y podría'l puntu a la fuelga qu'entamó'l pasáu 4 de febreru, y que por embargu nun paez convencer a unos sindicatos que cuenten llevalu mañana miércoles a referéndum énte los propios funcionarios de xusticia.

Según esplicó'l voceru d'UXT, Joaquín Vela, si'l resultáu de la votación de mañana ye positivu, los sindicatos van soscribir la propuesta y van poner fin a la fuelga, pero si pela contra, los trabayadores nun acepten la ufierta, que nun contempla los 200 euros mensuales que pidíen los sindicatos, ""siguirá'l paru"".

Dende'l puntu de vista de Vela, ""nun se sabe"" cómo va ser el resultáu de la votación, yá que ""hai opiniones dixebraes"" nos distintos sindicatos, CC.OO, UXT, CSI-CSIF y STAJ. Según esplicó nun comunicáu, el documentu contempla una xuba de 140 euros con efeutos nel 2008, dividíos en 60 euros a pagar dende xineru y 80 euros más, que van ser abonaos con calter retroactivu en xineru o febreru del 2009, demientres que los 40 euros que queden van entamar a pagase n'abril del añu que vien, lo que supón un aumentu de 180 euros mensuales.

El documentu completu, esplicaron los sindicatos nuna nota prensa, va ser sometíu a referéndum mañana en tol ámbitu non tresferíu, de manera que'l so resultáu ""va ser vinculante pa les organizaciones sindicales y, hasta'l so resultáu final nun va ser desconvocada la fuelga nel casu de qu'asina seya decidío polos trabayadores"".

En cualesquier casu, consideren la propuesta de l'Alministración ""bastante probe respeuto a la plataforma que soscribieron los trabayadores y que supunxo l'entamu de la fuelga"", yá que la so ""vindicación principal d'homologación coles Comunidaes tresferíes nun s'algama pal 2008, pese a que se garantiza un mínimu de 400 euros al mes nel complementu específicu a 31 d'avientu del 2009"".

De la mesma manera, llamenten que ""dempués de cuasi 60 díes de fuelga indefinida, l'Alministración nun fuera quién a cambiar dos propuestes fundamentales pa los trabayadores"", yá que ""nun llega a algamar"" la so vindicación de 200 euros al mes pal 2008."