Aperitivu de San Xuan en Caravia

En Caravia de va cuatro años p'acá decidieron que'l so San Xuan cai unos díes enantes, y que pa celebralo bona idea ye montar un conciertu na playa.

Nel conceyu Caravia adelanten la celebración del solsticiu de branu a esti sábadu día 19 de xunu. Nun ye la primer vegada que lo faen, concretamente esti ye'l cuartu añu qu'entamen esta folixa alternativa nun espaciu tan prestosu como ye la playa Espasa. Na playa yá dende pela tarde va haber xuegos infantiles pa la reciella, amás d'un taller de cometes. Pa eso de les 21:00 hores tendremos teatru de cai cola obra "El Padrín" de "Teatru pausa" y a les 22:30 los malabaristes "Ñeru los Coríos" van animar la nueche hasta prender la foguera a les doce la nueche.

A partir d'ehí, y cola foguera yá prendida, llega'l conciertu de folk-rock con "N'Arba" y "Dixebra", que van actuar ellí mesmu, al calorín de la foguera y na mesma playa. Dempués d'estos grupos llega'l turnu pal rock más contundentes con dellos grupos, los valencianos "Los de marras", "Desorden" y "Aprieta el culo".

Amás a lo llargo de tol día va haber puestos d'ONG'S, artesanía..etc, p'afitar d'esta manera'l sentíu alternativu de la iniciativa. Ésta entamala'l Conceyu Caravia, anque cuenta col compromisu, trabayu y ilusión de la xente del conceyu, que collabora de forma desinteresada na actividá, y que nel so momentu decidieron que San Xuan pa ellos cai'l día que-yos peta.