Corsino: una novela

Cole Kivlin ye un ciudadanu de los Estaos Uníos, pero tres del so nome n'inglés ta otra identidá desapaecía qu'apaeció xorrascando nel pasáu. Una novela autobiográfica publicada va poco recompón en primer persona la vida de Corsino, o de Cole Kivlin, que ye lo mesmo, un asturianu neñu de la guerra al que los acontecimientos llevaron a los Estaos Uníos y qu'agora recupera los sos orixes.

Ello ye qu'anque Kivlin lleva años asitiáu en Texas, la so primer residencia y el llugar onde nació nun ye otru qu'Asturies, d'au Cole, que d'aquella llamábase Corsino, tuvo que marchar en 1937 camín de Francia mientres la tropa nacional acababa colo que quedaba de la República nel Frente Norte. Tres de 5 años en Francia, la Segunda Guerra Mundial forzó a Corsino a pasar el charcu camín de los Estaos Uníos, onde tampoco nun foi a asitiar, pasando de casa en casa una bona temporada hasta qu'atopó un llugar fixu. Corsino escribe na novela que llegó a sentise como "una maleta que s'acarreta d'un sitiu pa otru" pero anque nunca más volvió a ver al so padre, tampoco nun guarda resquemor dengún por tolo que pasó.

El mesmu Corsino diz que "llega un momentu de la vida en que nun te da más polo que ta pasando y acépteslo".

Con too y con ello, y anque Cole Kivlin acabó por facese un ciudadanu dafechu de los EEUU y llegó a facer a la so propia familia, nunca nun perdió l'afoguín por recuperar los sos orixes. A la fin, y afaláu polos amigos, Cole Kivlin fizo 60 años dempués un viaxe de vuelta a Asturies de resultaos sorprendentes, llevándolu tola esperiencia recoyida a facer esta autobiografía, que namás ta disponible n'inglés pero que pue resultar de munchu interés pa cualquier llector asturianu.


Pues ver equí la reseña de "Corsino" n'Amazon y equí una entrevista col autor (too n'inglés)