Telefónica va paga-yos a los afectaos pol conciertu de Paul McCartney

La Unión de Consumidores d'Asturies, qu'amenazó con poner una denuncia contra Movistar tres del escándalu a la puerta del estadiu d'El Molinón el día del conciertu de Paul McCartney, nel que cientos de persones nun pudieron recoyer les entraes que regalaba la casa de telecomunicaciones, ta acabante de facer una anuncia conxunta con Movistar pola que la casa de móviles se compromete a compensar con 25 euros a cada persona afectada que lo reclame

Énte'l mal ritmu de la venta d'entraes pa ver a McCartney, que llevó a intentar negociar una cancelación del mesmu, la organización del macroconciertu vendió paquetes d'entraes a empreses col oxetivu de meyorar la entrada. Telefónica foi la que fizo una promoción más grande, y la casa de móviles punxo una taquilla pa despachar los miles d'entraes que tenía, pero la falta d'organización pa montar la cola y de personal p'atender a los agraciaos llevó a una situación caótica, viéndose bien ceo que diba ser imposible repartir toles entraes nun tiempu razonable. A les 10 y 10de la nueche, col conciertu entamando, la taquilla que regalaba les entraes peslló delantre de les cerca de 1.000 persones qu'entovía nun pudieren garrar entrada.

Al día dempués, la UCE amenazó con pone-y un pleitu a la casa de móviles, entamando una negociación qu'a la fin llegó esta mañana a una solución de compromisu pola cual dende'l llunes los afectaos van poder llamar, dende'l llunes qu'entra, día 14, al númberu 900 321 322 pa pidir la compensación, consistente en 25 euros de saldu pa los móviles de tarxeta y un descuentu pel mesmu importe a los de contratu. La compensación va valir tamién pa los qu'acutaron entraes dende móviles d'otres compañíes