UXT entra al Conceyu Abiertu Pola Oficialidá

La Xunta Pola Defensa de la Llingua celebró esti martes una reunión de la que salió yá la primer riestra d'organizaciones que soscriben el testu del Conceyu Abiertu Pola Oficialidá, la plataforma abierta qu'entama la Xunta Pola Defensa de la Llingua pa consiguir la introducción de la oficialidá de la llingua asturiana na próxima reforma del estatutu d'autonomía.

La Xunta, qu'adelantó que la presentación oficial del Conceyu Abiertu Pola Oficialidá va facese'l próximu día 23 de xunu, cuenta yá ente otres, coles firmes de partíos políticos como la URAS y d'instituciones como'l Conseyu de la Mocedá d'Uviéu, anque ye nel ámbitu sindical onde de momentu s'alcuentren los compromisos más representativos, coles firmes de Suatea y de la USO y la que ta acabante de producise d'UXT, una de les dos mayores centrales sindicales del país.

La Xunta Pola Defensa de la Llingua va siguir estes selmanes entrevistándose con toes aquelles entidaes y organizaciones que lo soliciten y tamién va empobinase a otres per iniciativa propia pa esparder la iniciativa hasta consiguir un consensu lo más ampliu posible, en cuantes que nun hai un plazu peslláu pa firmar y organizaciones y persones puen amestase a la iniciativa en cualquier momentu.