Greeenpeace entruga a los eurocandidatos pol mediu ambiente

La organización ecoloxista Greenpeace ta acabante de colgar na so web los resultaos de la encuesta que-yos fizo a 40 candidatos de toles principales llistes que se presenten a les elecciones del 13 de xunu al parlamentu de Bruseles. Greenpeace interesóse por conocer el paecer de los candidatos respective a dellos asuntos que van ser claves nesta llexislatura en Bruseles, como son la llexislación sobre productos químicos contaminantes y les polítiques a plicar sobre mediu ambiente marítimu.

Sobre estes últimes, Greenpeace proponía trés entrugues distintes, intersándose poles decisiones sobre la retirada de les artes d'arrastre, creación d'un mecanismu comunitariu encargáu de les reserves marines y la posibilidá de pesllar delles partes del mar a la pesca y otres actividaes

Ello ye que de 65 candidatos a los que se-yos unvió'l cuestionariu pertenecientes a seyes candidatures (PSOE, PP, IU Galeusca, Europa de los Pueblos y Coalición Europea) respondieron 40 candidatos, dándose la circunstancia de que nengún de los candidatos del PP devolviól cuestionariu respondíu. L'únicu asturianu na llista d'encuestaos ye'l candidatu del PSOE Antonio Masip.

En cuantes a les rempuestes, tolos candidatos del PSOE respuenden en bloque, lo mesmo que los d'Izquierda Xunida, Europa de los Pueblos o Coalición Europea. La contradicción llega nes files de Galeusca. Asina, mientres los candidatos de CiU y PNV enxertos nesta llista concueyen cola idea de desaniciar les artes de pesca d'arrastre, los candidatos del BNG refuguen dafechu tala posibilidá, y tamién la de crear reserves marines.