Carreño y El Franco, oxetivos prioritarios de la Xunta de Toponimia

Los conceyos de Carreño y El Franco van ser los primeros pelos qu'entame'l llabor de la Xunta de toponimia, según salió de la reunión que tuvo esti órganu'l pasáu día 2.

Como yá s'adelantare, el llabor de la Xunta diba entamar pelos conceyos que primero lo solicitaren, y dos cartes firmaes polos respectivos alcaldes de Carreño y El Franco acutaron plaza de privilexu pa estos dos conceyos, que s'empobinaron por iniciativa propia a la Xunta que preside Carlos Madera y qu'agora va revisar y completar tolos nomenclatores y llistes de nomes de los dos conceyos partiendo del llabor previu de l'Academia de la Llingua y d'otres instituciones.

Na reunión del 2 de xunu, na que l'ausencia más destacada foi la del caderalgu d'historia Javier Fernández Conde y a la qu'asistió por primer vegada la representante del RIDEA Josefina Martínez, aprebóse tamién el reglamentu de réxime internu de la Xunta de Toponimia. Pa la prósima reunión, que va ser el 28 de xunu, cuéntase con que más conceyos pidan l'asesoramientu de la Xunta

Entama asina la carrera por afitar tola toponimia oficial d'Asturies pal añu 2.007, oxetivu que se marcaron el Director Xeneral de Promoción Cultural Carlos Madera y el director de la Oficina de Política Llingüística Ramón d'Andrés. El procedimientu que va siguise va ser el de pasar los llistaos de topónimos primero peles corporaciones municipales y llevalos dempués hasta Xunta de Gobiernu del Principáu pa que los aprebe definitivamente