60 años del desembarcu de Normandía

Güei faense los 60 años del desembarcu de Normandía, operación militar que dio'l reblagu definitivu al dearrollu n'Europa de la II Guerra Mundial, acorrripiando dende esi momentu les tropes aliaes dende l'occidente y les soviétiques dende l'oriente a l'Alemaña nazi que claudicaba finalmente en mayu del 45, ello ye, en menos d'un añu.

Más de dos millones de soldaos entraron dende les bases ingleses al continente gracies a l'avanzada normanda, una posición que los alemanes vendieron cara anque la teníen mal defendía en cuantes que contaben con una invasión per Calais. Cerca de 4.000 persones morrieron nes primeres hores del ataque.

La celebración d'esta mañana, presidida pol presidente del estáu Francés Jacques Chirac y pol d'Estaos Uníos George Bush en representación del exércitu que más efectivos punxo na operación, trató del pasáu y tamién del presente. Ello ye que, dempués de la engarradiella diplomática ente Francia y EEUU a cuentu de la invasión d'Irak, l'actu de conmemoración valió p'amigar, polo menos énte les cámares de la tv, a los dos estaos.


La rede ta güei estrada de webs nes que poder enanchar información sobre la Batalla de Normandía. Ente lo qu'afalamos a visitar dende Asturies.com sorrayamos l'especial de la BBC, el
del periódicu francés Liberation y la web del D-Day Museum de Nueva Orleans

El desembarcu foi un trunfu militar definitivu, y el 24 d'agostu la tropa aliada lliberaba París, anque pagando un preciu en baxes de más del 10% del total d'efectivos. La primer división n'entrar na capital francesa yera la "División Leclerc" una de les dos divisiones que lliberaron Francia xunta la "13 Demi Brigade" nes que participaben soldaos de l'antigua República Española, bien d'ellos asturianos y dellos veteranos incluso de la Revolución del 34, ello ensin escaecer a los emigrantes y descendientes d'emigrantes asturianos enxertos na tropa americana que tomaron parte nel ataque. Sobre los primeros pue conocese más nesti artículu d'Historia 16, mientres que la prestosísima web "AsturianUS.org" que caltién dende los EEUU Art Zoller Wagner tien incluso semeyes de memoriales de la II Guerra Mundial estraos d'apellíos asturianos