Flook y Felpeyu nel San Xuan de Llugones

Na nueche de San Xuan, el miércoles 23 de xunu, surden per toa Asturies nueches folk y Llugones tien preparada una bien interesante.

L'asociación socio-cultural Beltain entama un programa d'actividaes pa la tarde y la nueche del miércoles ventitrés. Dende les 18:00 hores va haber deportes tradicionales, tonada y cuentacuentos que van dir preparando l'ambiente pa una nueche que pa munchos ye máxica. Nella la música folk van ponela dos bandes d'abondu prestixu, los asturianos "Felpeyu" y los ingleses "Flook". Estos últimos son un cuartetu formáu por Sarah Allen cola xiblata de metal y el curdión, Brian Finnegan cola xiblata de madera, Ed Boyd na guitarra y Jon Joe Kelly col bodrahn. Va tiempu nesti grupu tocó'l perconocíu xiblateru de "Capercaille" Michael Mcgoldrick, pero dexó la banda por otros proyectos musicales. Con cuatro discos "Flook" ye una de les bandes más importantes del folk internacional. Anque seyan ingleses, los sos oríxenes irlandeses son sida abondo pa que los músicos faigan esi folk irlandés acústico col que podemos topar paecíu en grupos como "Lunasa". Pa quien nun pueda velos esti día 23, adelantamos que Flook tamién va actuar nos Alcuentros de Trebolgu d'Uviéu'l día venticinco d'esti mes

Nos próximos díes dende Asturies.com vamos siguir dando detalles d'esta y otres nueches de San Xuan.