Tres les güelgues del Cachuchu

"El Ministeriu de Mediu Ambiente investiga, al traviés de la Fundación Biodiversidá, la posibilidá de declarar diez nueves zones marines protexíes, como yá ficiera col Cachuchu, el monte submarín asitiáu a 60 quilómetros de la costa de Ribeseya y primer Área Marina Protexida n'España. Dalgunes de les propuestes que tán analizándose son el Cabu de Creus en Cataluña y el Canal de Menorca en Baliares, asina como'l Banco de Galicia. ""Hai mui poques árees submarines protexíes, lo qu'obliga a siguir investigando"", almitió la ministra de Mediu Ambiente en funciones, Cristina Narbona, durante la so participación, xunta cola tovía ministra d'Agricultura, Pesca y Alimentación, Elena Espinosa, na inaguración del seminariu ""Biodiversidad Marina"".

Nesti sen recordó que-y correspuende al Estáu la proteición de los espacios marinos que nun tean direutamente conectaos cola plataforma continental. ""El Cachuchu ye un monte submarín con más de 600 especies y nel que se tienen descubiertes dos nueves que yeren hasta agora desconocíes pa la ciencia. Asina tenemos entamaos los trámites pa sumala a la Rede Natura 2000, porque camentamos que cumple coles condiciones de la Direutiva Hábitat"", señaló.

Narbona sorrayó que'l fondu la mar ye una importante fonte de recursos enerxéticos, agua potable y alimentos y que tien de recibir un nivel de proteición acordies col que reciben otros espacios naturales de tierra. Poro, comprometióse a siguir ameyorando'l conocimientu de ""tolo qu'agospien los mares"", faciendo un esfuerzu por amenorgar los niveles de contaminación. ""Un 70 por cientu de la contaminación de los mares vien de los vertidos que mandamos dende la tierra, de la mala depuración de les agües y de la propia contaminación atmosférica""."