Mensaxes críticos nel Día Mundial del Mediu Ambiente

Xunta los mensaxes oficiales de celebración, los colectivos ecoloxistes aprovechen la viéspora de la celebración mañana 5 de xunu Día Mundial del Mediu Ambiente, instituyida pola ONU y dedicada esti añu a la conservación del mar, pa facer llegar a la sociedá un mensaxe críticu cola realidá mediuambiental. Asina, esta mañana miembros de Greenpeace colgaben una pancarta de la fachada de la Ilesia de la Sagrada Familia de Barcelona, como pue vese na semeya.

Allegándonos más pal nuestru país, la Coordinadora Ecoloxista d'Asturies fizo, pela so parte, un analís de protesta nel que resume la situación mediuambiental asturiana. La Coordinadora acusa al Gobiernu asturianu de ser el promotor de grandes proyectos d'impactu ambiental que faen del executivu astur "la mayor amenaza" pal nuestru territoriu, al dicir del grupu ecoloxista que dirixe Fructuoso Pontigo.

El proyectu d'estación d'esquí en Puirtu Braña (Fuentes de Invierno) el proyectu d'albergue del Meicín, l'ampliación de les minas de Degaña y otres infraestructures como'l túnel del Rañadoiru son lo más gordo d'una llista d'ataques al mediuambiente afalaos dende'l Gobiernu, según la Coordinadora

D'otra manera, los ecoloxistes ven qu'hai una mala planificación de los recursos hídricos, col proyectu d'embalses como'l de Caliao en Casu o'l de San Xulián n'Ayer, que contribuyen a la degradación de la rodiada d'esos calces d'agua, cada vegada más canalizaos y llendaos.

La preocupación pol agua va de los ríos a la costa, onde la Coordinadora aprecia que'l Plan del Litoral asturianu (POLA) va faer un dañu grande sobre espacios hasta agora ensin antropizar cola urbanización de caleyes, aparcaderos y árees recreatives, ello arreyao a planes urbanísticos municipales, que busquen más el beneficiu particular que la conservación del territoriu, casu de la urbanización que quier facese en La Talá (Llanes)

En cuantes a la mar, la Coordinadora tien pa ella que los caladeros asturianos aguanten una presión pesquera muncho mayor de lo que debieren, sufriendo sobremanera'l dañu que faen nel fondu los métodos d'arrastre qu'empleguen barcos asturianos y gallegos

El repasu de puntos prietos na xestión mediuambiental asturiana llega a la xestión del monte, onde los ecoloxistes ven que la superficie de viesca ta allancada mientres les especies alóctones van colonizando más suelu, llegando yá nel casu del ocalitu a les 75.000 hectáries.

El funcionamientu "en precario" y ensin tar conformes a llei de mines n'abertal y canteres abre un capítulu dedicáu a la contaminación atmosférica, acusándose a l'alministración de falta de voluntá de control sobre les industries contaminantes, acusación que llega tamién a la contaminación del suelu, los fallos nel saniamientu del agua residual y la xestión de la basura, na qu'aprecien un "retrocesu".

Ello ye que la Coordinadora diz que cada vegada ye mas rala la presencia de contenedores de recoyida selectivo y que ta faciéndose un apueste pola incineración de basura que nun ven afechiscu.

Capítulu aparte merez la contaminación electromagnética, na que, aparte de la presencia de los repetidores de telefonía móvil, dase tamién la circunstancia de que munches estaciones de tresformación d'alta tensión siguen asitiaes en baxos de viviendes, ello mientres se planeen dos grandes llinies d'alta tensión atravesando gran parte del país.