Sigue alantre'l procesu del Conceyu Abiertu Pola Oficialidá

Dempués de dar a conocer la iniciativa la otra selmana énte más de 35 organizaciones polítiques, sindicales, sociales y culturales de toa triba, la Xunta Pola Defensa de la Llingua Asturiana ta acelerando esta selmana tola dinámica que yá tenía prevista d'entrevistes y reuniones con entidaes representatives de la sociedá asturiana col envís de xenerar un consensu lo más ampliu posible alredor de la idea básica cola que se creo'l Conceyu Abiertu Pola Oficialidá, venceyar a tola sociedá nuna plataforma que tenga como única reivindicación común la consecución de la oficialidá na próxima reforma estatutaria.

Ello ye que, al marxe de les reuniones que solicitó la Xunta con estes entidaes, munches organizaciones tan solicitando elles aconceyar pa conocer más detalles sobre la iniciativa, lo que ye amuesa según los responsables de la Xunta Pola Defensa de la Llingua Asturiana, del interés que ta xenerando la propuesta.

Dientro d'esta dinámica de reuniones, la Xunta Pola Defensa de la Llingua Asturiana convoca pal próximu martes día 8 de xunu un nuevu Conceyu Abiertu d'asistencia llibre y que va tener llugar na Residencia Ramón Menéndez Pidal, asitiada na Cai Clavería númberu 14 d'Uviéu, xunta la Escuela oficial d'Idiomes d'El Cristo