Asturies conmemora’l día ensin tabacu

Mientres nel mundu muerre una persona cada seyes segundos por culpa d'enfermedaes rellacionaes col consumu de tabacu, n'Asturies el viciu de la fumadera mata a cerca de 2.300 persones cada añu. Más de 300.000asturianos son fumadores, y d'ellos más de 160.000 fumen más d'un paquete de venti pitos al día, pero la estadística diz que cada añu fuma más xente mozo y qu'un de cada trés asturianos de más de 15 años tien el vezu de fumar.

El viciu de la fumadera ta enraigonando sobremanera ente les muyeres más moces, y ye que'l 45% de les asturianes d'ente 15 y 44 años fumen. Por ello la Conseyería de Salú va centrar les actividaes d'esti día mundial ensin tabacu nos institutos, onde'l 30% de las alumnes y el 20% de los alumnos de segundu cursu de Bachilleratu fumen tolos díes.

Mientres n'Asturies el tabacu ye'l mal de la mocedá, a escala planetaria la celebración de la Organización Mundial de la Salú va per otru camín. Baxo'l lema "Tabacu y probitú, círculu viciosu" les Naciones Uníes quieren facer llegar el mensaxe de que'l tabacu ta convirtiéndose nun viciu que domina más a los países del tercer mundu y en víes de desarrollu, onde tan el 84% de los fumadores. Xunta esto, la OMS rescampla qu'estos países son los que tienen unes lleis menos restrictives pal consumu de tabacu.