Los responsables de "L'Arca de Zoé" yá tán llibres

"El presidente de Chad, Idriss Déby, robló esti llunes una orde de perdón gubernamental pa los seis cooperantes franceses de la ONG ""L'Arca de Zoé"" deteníos n'avientu cuando tentaben treslladar a Francia, ensin el permisu de les autoridaes, a 103 menores supuestamente ensin familia. Los cooperantes foron condenaos a ocho años de trabayos forzaos en Chad, anque'l gobiernu francés consiguiera que cumplieran la pena nel so país, acordies col conveniu de cooperación robláu por dambos países.

A lo llargo'l xuiciu, los seis acusaos negaron los cargos y afirmaron tar convencíos de que lo que facíen yera rescatar a los neños y neñes víctimes del conflictu bélicu de la zona vecina de Darfur. Por embargu, la ONU y les autoridaes de Chad fueron a demostrar que los menores yeren de los pueblos de Chad que s'alluguen na llende con Sudán.

Dende esi momentu Francia vien desplegando un fuerte operativu diplomáticu, amosáu pente medies de midíes como l'apoyu que'l gobiernu-y prestó al actual presidente de Chad dempués de qu'una xunta de fuerces rebeldes tentara tomar la capital. Arriendes d'ello, Déby mostró la so disposición a decretar el perdón pa los seis cooperantes, intención qu'acaba facer oficial."